S Schnadehärzli blüetet
Genau jetz würd üses Platzkonzärt am Naseball starte,
doch leider müesse mir haut ou uf das no es Jöhrli warte.
Ä Fasnachtsfriti nid mit de Schnadehüdeler z mache,
das hätte mir üs nie chönne vorstöue, und hei eich nume drüber chönne lache.
Leider isch aus chlei angersch cho,
und dä cheibe Chäfer het d'Überhang gno.
mir touche chlei ab wies eigentlich wär,
jo es duet scho chlei weh,
und s schriibe faut schwär!
aber do glich es paar Gedanke
zum villech chlei erinnerige z'tanke...
am samsti die legendäri Tour mitem Car,
jo dä obe dä isch jedesmou wunderbar.
ob i chäuer, beize, bars oder haue, eifach goh musig mache
das würd üs jetz gfaue!
am sunntig aui zäme dr umzug z'biberist zmache,
vorus dr nachwuchs wo de zueschauer verteilt die süesse sache
üs wärs egau obs rägnet oder schneit,
houptsach mir heis zäme luschtig, däm seit me gsöuigkeit.
die würde mer de ou am obe nomou richtig gniesse
und d fasnachtshaubzyt mit em ne feine ässe und em ne guete tröpfli begiesse.
de am mäntig dr naseball ufruume und entdekoriere,
und no chlei über s erläbte philosophiere
de scho wieder ab go schminke,
vo witem gseht me scho dr carchauffeur winke.
es uftrittli dört und no eis do,
jo so chönnts eigentlich ewigs witergoh.
im car wird gsunge und seich verzöut
und bi dr reiseleitig vo hinge wird no fliessig bier nochebstöut.
im vordere teil si d froue am schöttli vernichte,
jo ou do gäbs no so vöu z brichte...
id vorstadt ziehts üs de am zischti-nomi
mou ohni instrumänt, die bruche mer jetz grad noni.
mit em ne bierli i dr hang düe mir zäme dr umzug gniesse
und nang ab und zue ä hampfele konfetti aschiesse!
jo es wärde haut aui wieder chlei zu ching,
mit so kostüm und chlei schminki am gring.
ändlech hole mer die instrumänt und starte,
mir hei scho fasch nüm möge warte!!
de gohts ab so richtig chutz,
dört gits chlei Tequila und zum abschluss no äs Lutz...
de geits witer richtig Stadt dür d Gasse,
läck, do hets jo richtigi mönschemasse!!
mir spiele und spiele, gäbe aui üses beschte
und fröie üs das d Lüt so mit üs chöi feschte...
blottere a de finger und offni lippe,
jo, mir hätte eich gärn für die fasnacht glitte!
am äschermittwuch würde mer de üsi lampe abehänke,
und derzue no chlei ad fasnachtshighlights dänke...
jo ou das johr hanget die Lampe im Dorf z'niederwiu
aber highlights vo dere fasnacht... jo das si leider nid grad vöu!
mir hoffe das mer nöchst johr wieder dörfe fiire,
ohni maske, mit üsne fründe und ohni viire!
heits guet i dere schwäre zyt,
lueget zuenech, blibet gsung und fit
öichi schnadehüdeler