SCHNADEGSCHICHT

D' Töffe im Schopf si zuedeckt und d'Mitglieder vom Töffclub hocke ir Beiz und Jasse!

<<"Sch... Wätter" dusse und immer nume jasse das chas jo ou nid si.>>

<<Chum mir wei wieder mou öppis nöis afo, gli isch Fasnacht mir mache doch e Gugge>>

- so chönnts im Winter 1976 z'Günschberg im Bellevue tönt ha.

<<Was weit dir jetz do dir "SCHNADENE">> tönts vom Näbetisch.

<<Heb doch dr Latz du "HUDERE">> hei sie umegäh.

So eifach isch dr Name SCHNADEHÜDELER entschtange.

Im Schwingerchäuer vom Bellevue und im Schützehuuschäuer hei sie probet.

A dr Fasnacht 1976 si sie mit de Chesslerhemmli uf em bekränzte Wage los, zoge vomene Traktor und si uf Tournee gange:

vo Günschberg über Rüttene, Solodurn, Zuchu, Luterbach und Hopperschte si sie natürlich i aune Beize gsi.

D'Lüüt hei e riese fröid gha und sie natürlich ou!

S Johr druf si einigi vo ihne is Militär, drum hei sie d'Fasnacht müesse lo usfaue.

Die nöchschte Johr drufabe hei sie gäng dervo gredt, dass sie wieder wette afo.

Aber gäng wenn's so wiit isch gsi si sie z'schpot gsi, probet hei sie no nie und d'Fasnacht het scho agfange.

Im 1984 si sie de ändlech zäme ghocket, hei afo probe und hei d'Gründigsversammlig gmacht.

D'Fasnacht isch e riesige Erfoug gsi, sie hei sich aus Höhepunkt am Zischtiobe sogar i d'Stadt gwogt und hei fasch nümme hei chönne.

Am 20. April 1985 het die erschti GV mit 31 Mitglieder stattgfunge.

Dr Gurtner Roli isch dr Oberschnade und die Musikalischi Tunte gsi!